我們在東涌接觸過不少少數族裔，每次傾談十居其九都會說到少數族裔在社區生活的挑戰，不是語言和文化差異問題，就是歧視或社區參與等問題。但跟Daniel傾談就截然不同，聽他說話，我們好像完全感受不到一種弱勢氣味，相反，他是一個充滿自信的人，能力感滿載的他，最常講的就是不斷挑戰自己，要變得更「勁」、更強。
愛拚才會贏！？：拚的氛圍、拚的機會
Daniel在逸東邨出生和長大，操一口流利的廣東話。他的父母由泰國來香港生活已20多年了，由於在工作上需要與華人接觸，所以父母都會說廣東話，而且在家裏他們也多數以廣東話溝通，所以Daniel基本上自小就在廣東話的環境下成長。喜愛挑戰自己的他，從讀書到打籃球，都貫徹要挑戰自己，令自己變得更勁。他說：「因為中學嗰啲NCS嘅（中文）就係將英文翻譯做中文，我覺得係簡單好多。咁其實如果我一直讀NCS嗰啲中文係冇挑戰性囉，我一定啱晒咁樣。但係轉番做（本地學生的）中文課程，就有挑戰性。」
Daniel自13歲起就跟着任足球教練爸爸一起與16、18歲球員一起踢波，運動的基本體能根基亦因而打好了。Daniel了解自己是一個非常運動型的人，十分好動，而且熱愛運動，雖然深知在香港做運動員是一件很難的事，但他也想去試一試。跟讀書一樣，在運動方面他的學習模式同樣是經常與強人一起練，他相信：「你同啲勁嘅人一齊打一齊練，雖然你可能會俾佢打爆咁樣啦，但係我覺得唔係問題，即係我覺得你只要係有心去繼續練……可能你有一日可以好似佢哋咁樣，好似佢哋咁勁。」Daniel記得小時候在排球場裏看17、18歲的「大人」練習閃避球，然後與他們一齊玩，發現他們是真正的閃避球隊成員，Daniel在他們身上學習到正規的閃避球，而且還差點成為港隊成員。
回想自己對籃球產生真正興趣，Daniel說是從認識東華的社工開始。當時有一些東華的外展社工到球場，嘗試與他們傾談。Daniel初時都不以為然，後來有時會和他們一起打籃球，有時參加一下他們組織的小型籃球比賽，有時又會有些外人過來教他們打波，慢慢發現籃球的樂趣，更想好好提升一下技術，認真地發展起這興趣來。
邨Jump作為籃球夢打拚的社區平台
社工知道營造東涌項目的凝動香港體育基金有一個「邨Jump」計劃，很適合Daniel參加。同時，Daniel也觀察到校內有一位打籃球很厲害的師兄，在參加邨Jump後提升了不少實力，因此他決意要參加邨Jump，希望自己打波的能力也能提升。Daniel在邨Jump計劃內，被編入迎東破浪隊。同年，Daniel打波的才能也吸引了老師的眼球，被邀請加入中學的校隊，正式開始同時代表學校和代表屋邨打籃球的歷程。
在邨Jump計劃之中，Daniel發展出成為籃球運動員的目標，計劃亦讓他看見達至目標的可行方法，令夢想不只是夢。他說：「我哋依家個教練係香港甲一嘅球隊嘅一個主教練。咁佢係有能力可以令到我入，即係俾我去入佢嘅乙組呀，甲二或者甲一嘅咁。你要喺佢面前，即係表現到自己……（當然）佢可以唔揀你，可以揀其他人，因為其他人勁過你……」Daniel認為自己現在的實力還未足夠加入乙組，但會再努力練波，希望有天能成功躋身乙組，然後到他脫離中學學界及邨Jump之後，繼續打籃球、繼續強化自己，讓更多教練認識自己，一步一步走進香港甲一籃球聯賽。Daniel雀躍地分享：「我嗰隊已經有3個（成功入乙組）。有一個係我學校嘅，就係啱啱講嗰個，就係佢囉﹗佢好似係參加咗3年定4年，最後，佢喺今年入咗乙組，係因為教練推薦佢入去乙組。仲要攞埋嗰個獎學金入去囉，係一件好勁嘅事囉﹗」
現在，代表不同單位去比賽，Daniel感覺有不同的意義：「咁話晒邨Jump都係全港屋邨嗰啲其他人去一齊參加，而之後去打比賽，咁首先個實力就一定係分別有高啲啦，啲球技就勁啲啦，挑戰性係會大啲囉﹗邨Jump好容易教你點樣打波嘅，即係可以睇下出面啲人係幾勁，即係我知道自己嘅不足囉。」至於代表學校，可以分為兩個層次，其中之一是學屆分區賽，另外，還有一個叫全港學屆精英賽，集合各區A Grade（18至16歲）隊伍的冠軍，再爭取一個終極冠軍。Daniel以對手的實力去排序，覺得「精英賽係第一，第二就係邨Jump，學屆分區嗰啲就最後。」
籃球的邨代表：個人能力感轉化為社區歸屬感
然而，Daniel補充說，可以代表屋邨去打波都很好，邨Jump是一個好的計劃。其一，隊中不乏一些只有14歲的隊友，有助對籃球有興趣的青少年及早發展，認識如何打比賽，開闊視野，並累積珍貴的經驗，使他們可以繼續打籃球。其二，Daniel覺得能代表屋邨打比賽真是很開心：「其實（本來）可能其他人唔知我呢個係咩邨，但係突然間因為邨Jump呢個計劃呢，我哋逸東邨就變咗一個籃球隊嘅邨……可能你同人哋講，你打逸東狂獅嘅，可能佢知係一個勁籃球隊。好容易俾人知道係咩隊，係個咩邨囉﹗」透過全港屋邨之間的比賽，成功將地區及個人榮耀聯為一體，不知不覺間都加深了Daniel對東涌的歸屬感。東涌人為東涌出戰，增加球員作為居民的自豪感，如果打出成績，後來者就會想加入這勁旅，令東涌人更加自豪。
今年是Daniel參加邨Jump的第二年，他由迎東破浪隊轉到屬於自己所住的邨隊逸東狂獅。我們好奇回歸自己的屋邨會是怎樣的感覺，Daniel認為都是差不多，因為不論富東戰神、迎東破浪，還是逸東狂獅，都是代表東涌，他也是會盡力爭勝。他說：「你出去打波唔會同人哋講你係咩邨，因為佢哋唔知吖嘛，但係你話你係代表東涌去打比賽，會即刻多啲人知道東涌呢個邨，贏咗就會即係令到人哋知道東涌都有勁人囉﹗」隨即讓我們想起Daniel初嘗勝利滋味的分享：他們在邨Jump比賽中，有一次在只有六七位球員能出賽的情況下，面對勁旅富山隊，竟然能夠嬴波，而從此其他人就知道東涌都有強隊。
社區平台的無限延展和可能
邨Jump計劃透過建立屋邨球隊和聯賽，除了讓青年人多做運動，讓他們不論家境都可平等地獲得資源以發展潛能，同時也培養青年對社區的歸屬感，參與共同建立社區形象。個人及社區的聯繫，產生了微妙的相互促進作用。同時，透過凝動的網絡，更不時撮合具興趣及有潛能的青年和香港的專業球隊、大型賽事，讓青年人看見追夢的通路，也為專業球隊發掘人才多開一條路徑。
從社區營造的角度看，計劃可以再走遠一點嗎？Daniel說：「可能你係教自己住嘅屋邨啲小朋友打波，咁就梗係一定一定就會好落力去教佢哋囉，因為你都想佢哋大個以後都好勁咁，都可以代表自己東涌去打比賽，係一個好好自豪嘅事﹗」其實，像Daniel這些參加者，不只是計劃中的所謂「受惠者」，只要能看到他們潛在的貢獻者身分，就能夠創造更多對他們自已、對其他個體、以至整個社區的影響。
